गणेश वंदना (तोषण चुरेन्द्र धनगांव)

गणेश वंदना

मोर गउरी के गणराजा

तोला सुमरत हँव मँय आजा

शंकर सुवन तँय बुद्धि देवइय्या

अरजी हमरो पाजा.......मोर...

दाई ददा हे सबले बड़का 

सगरो जगत ल बताए

तीन लोक तँय माने देवा

चक्कर सात लगाए

पान फूल अउ नरिहर भेला

लड्डू भोग लगाजा....मोर ...

रिद्धि सिद्धि संग मा बिराजे

शुभ लाभ बड़ सोहे

गजमुख चारभुज हे लंबोदर

माँथ मा सेंदुर मोहे

सबले पहिली तोर मनौती

दरसन हमुला देखाजा....मोर

भादो महिना तैह तोर पूजा

भगत ह आशीष पावय

जेन मनावय तोला गजानन

भर भर झोली जावय

संझा बिहना "तोषण" भजत हे

लेके घंटी बाजा....मोर...

तोषण चुरेन्द्र "दिनकर"

धनगांव,डौंडी लोहारा

बालोद, छ.ग.