जतन अपन गाँव के...

*_जतन अपन गाँव के_...*

*************●***********

करलव दीदी ओ करलव भैया गा,

जतन अपन गाँव के।

कोयली बोली चिंहूँर माते,

बर पीपर के ठाँव के।

करलव दीदी ओ.....

*************●***********

नदियाँ नरवा खेती डोली के,

करलव गा तियारी।

नाँगर बइला चेत करलव,

धनहा अउ बियारी।

छुनुर-छुनुर बाजय पइरी, 

धरती दाई के पाँव के।

करलव दीदी ओ....

*************●***********

कातिक आईस कोठी भरगे,

भाग हा लहरागे।

ओढ़े कमरा डोकरी दाई,

हाँड़ा कपकपागे।

सगा के संदेश देवय,

सुनव कँऊवा काँव काँव के।

करलव दीदी ओ....

*************●***********

लाली पिंवरी  फूल फूले,

भुँइया के फूलवारी मा।

सतरंगी फगुवा माते,

लइका के किलकारी मा।

नंगारा कस बादर गरजे,

दनदनादन दाँव के।

करलव दीदी ओ....

*************●***********

भुँइया के सिंगार करव,

रूख राई लगावव।

भारत माता के दुलौरिन,

छत्तीसगढ़ ला बचावव।

बघवा कस हूंकार देवव,

दगदगले हाँव के।

करलव दीदी ओ.....

*************●***********

रचनाकार:-

तोषण चुरेन्द्र दिनकर

धनगांव, डौंडी लोहारा

बालोद,छत्तीसगढ़

08/09/20