तोर मया मा मँय हँव दिवाना

*तोर मया मा मँय हँव दिवाना*

नाँव ल लेके मँय मर जाहूँ , 

छोड़ मोला जब जाबे तँय।

तोर मया मा मँय हँव दिवाना , 

पाछू फेर पछताबे तँय।

पानी बिना मछरी कहाँ जाहूँ ,

झिन मोला तरसाना ओ।

नदिया नरवा डोंगरी पहाड़ी ,

घूमँव बनके दीवाना ओ।

सुतन नइ देवस सारी रतिहा ,

अउ कतका तडपाबे तँय।

तोर मया मा मँय हँव दीवाना ,

पाछू फेर पछताबे तँय।

मोर जिनगी हे कारी अमावस , 

चंदा बनके करदे अंजोर।

तोर पीरीत बर तरसत हावँव , 

जइसे अमरित बर हे चकोर।

मया के बरखा बनके गुंईया ,

पल छिन पल बरसाबे तँय।

तोर मया मा मँय हँव दीवाना ,

पाछू फेर पछताबे तँय।

धधकत जिवरा तोर मया बर ,

खावत हँव किरिया मान ले।

प्रेम परिच्छा झन ले गोरी ,

दिल के दरद ला जान ले।

चाहहूँ तोला खुद ले जादा ,

मया अइसन कहाँ पाबे तँय।

तोर मया मा मँय हँव दीवाना ,

पाछू फेर पछताबे तँय।

©®

तोषण चुरेन्द्र 'दिनकर' 

धनगांव डौंडीलोहारा 

बालोद छत्तीसगढ़ 

6/11/25//9.18pm