दाइज के दावन म(नोहर आर्य) daij ke danav ma( nohar arya)

दाइज के दावन म,

                     घर के लछमी भूंजावत हे।

वाह रे !बहादुर बेटा, 

                    चारों मुडा सोर गुंजावत हे।।

भउतिकता के फेर म,

                      नइ चिन्हत हस हीरा ।

मनखे ल मनखे नइ जाने, 

                        जानेस केंवची खीरा ।।

सात बचन सातों किरिया ,

                            धारे धार बोहावत हे।

थोरको कोन्हो अनबन होइस,

                  तलाक के रद्दा जोहावत हे।।

बात बात म नता टूटत हे,

                 दूनो ले बीसवांस छूटत हे।

इहाँ गाय उहाँ भैंस के फेर म,

                    बसे बसाय घर टूटत हे।।

सीख लेवव सियान ले, 

                जिनगी अपन पहा दिन हे ।

मया पिरीत के बंधना ल, 

                कटकट ले गंसिया दिन हे।।

 ___________******_____________

                      नोहर आर्य, 

    फरदडीह, जिला बालोद,छत्तीसगढ़ ।