किसान के पीरा(नोहर आर्य)kisaan ke pira(nohar arya)

* किसान के पीरा *

              ---------****--------

   किसान के पीरा,

                        आनीबानी के कीरा।

   सोन म घुना लगे,

                         कहाँ ले मिले हीरा।।

 * किसानी म जांगर टोरे,

                             तब चार बीजा ल पाय।

  होय हुवाये मरना होगे , 

                        जब छोटे बड़े कीरा झपाय।।

   कतको उपजाथे तभो......ऊँट के मुहूँ मे जीरा!

    किसान के पीरा...........आनीबानी के कीरा!!

    सोन म घुना लगे...............कहाँ मिले हीरा!!!

  * तनाछेदक,झुलसा,माहो,

                                     आय किसान के पीरा।

    ऐकर छोड़ सेठ महाजन,

                                   अउ होथे सरकारी कीरा।।

    बड़े बड़े कीरा मन ताकत हे.....देखके धान के भीरा!

     किसान के पीरा...................आनीबानी के कीरा!!

     सोन म घुना लगे.................कहाँ ले मिले हीरा!!!

  *  कमा के बिचारा घर नइ लाइस,

                                           पहुंच गे हावय तगादा।

      महाजन ह मेछा अंटियाय,

                                   सरकारी ह कुर्की बर डरवाय।।

    काकर मे देखावय घलो........  अपन छाती के चीरा!

    किसान के पीरा.................. आनीबानी के कीरा!!

       सोन म घुना लगे.................कहाँ ले मिले हीरा!!!

   *  करजा म लदाय किसान ,

                                            पिसावत हवय पिसान।

      सारी दुनिया ल पोसके,

           .                                  बनगे हवय भगवान।।

    खीरा गिरय छुरी म...............घन छुरी गिरय खीरा!

     किसान के पीरा....................आनीबानी के कीरा!!

      सोन म घुना लगे...................कहाँ ले मिले हीरा!!!

       ------------------------********---------------------------

                                   नोहर आर्य,

           फरदडीह,(डौंडी लोहारा)जिला बालोद, छ.ग।