वाह रे!स्माट फोन(नोहर आर्य) wah re smart phone (nohar arya)

**    वाह रे!स्माट फोन **

   जब ले आइस स्माट फोन, 

                             सब चलावत हे नेट।

    का टूरी का टूरा सबो,

                               जंउहर हावय सेट।।

   सुत उठके सब ले आगू, 

                                खोलत हावय नेट।

  घर दुवारी कुकूर भूंके, 

                                कोनों ल नइहे चेत।।

    दाई कथे उठना बेटा, 

                                होगे रे बिहिनिया ।

     अंगाकर संग खाले बेटा, 

                                 पीसे हंव चटनिया।।

       सोसन भर खाबे तब,

                                  भर जाही तोर पेट ।

          कोचकत रहिथस फोन ल,

                                  स्कूल बर होथे लेट।।

           ददा सिधवा गंवईहा ठेठ,

                             करजा म बूडे पेटला सेठ।।

           टूरी बात का कहिबे,

                                 दिखत हावय टिपटाप।

             का बाना ल अरोय रहिथे,

                                     दिखथे निच्चट हाफ।।

              आडी काडी करय नहीं, 

                                  कभू धरे न हंसिया बेंठ।

               उत्ता धुर्रा सेट बदलत हे,

                                   घेरी बेरी पूछत हे रेट।।

             कतकोन बरबाद होके,

                                    जिनगी ल देथे मेट।

             काला काला बतावंव भइया, 

                                 देख के चलावव नेट।।

                                   देख के चलावव नेट,,,,,,

   ___________**********______________

                         नोहर आर्य 

          फरदडीह, जिला बालोद,छत्तीसगढ़ ।