घरो घर लगे हे तारा (नोहर आर्य) ghro ghar lge he tara (nohar arya)

*  घरो घर लगे हे तारा *

                     ----------****----------

  गंवई गांव ह सून्ना लागे,

                                गली खोर अउ पारा।

  फदके कातिक चिलचिल बूता,

                                घरो घर लगे हे तारा।।

*बड़े बिहनिया सुत उठके,

                                भउजी ह भारा डोहारय।

  काम बूता बियापय नहीं,

                                 मुच मुच मुस्की ढारय।।

  सालभर के कमई सकेले.......जेन मुहूँ के काँवरा!

  गंवई गांव ह.....................गली खोर अउ पारा!!

   फदके कातिक.................घरो घर लगे हे तारा!!!

* बासी पेज सब खेते डहर हे,

                                    थोरकुन छांव म सुरतावय।

   आज के बासी काली के साग,

                                        खाके जीव ल जुड़ावय।।

  भूख म सबो मिठाथे.........अलोना होवय के खारा!

   गंवई गांव ह.......................गली खोर अउ पारा!!

    फदके कातिक...................घरो घर लगे हे तारा!!!

*  गऊ बरोबर सिधवा होथें,

                                         अपन काम बूता ले काम हे।

   जुरमिल के सब संग रहिथें,

                                          अपन गांव म चारो घाम हे।।

  छत्तीसगढ़िया सबले बढ़िया......आवय हमर एके नारा!

  गंवई गांव ह...........................गली खोर अउ पारा!!

  फदके कातिक................  ..... घरो घर लगे हे तारा!!!

       -------------------******---------------------

                            नोहर आर्य,

     फरदडीह,(डौंडीलोहारा) जिला बालोद,छ.ग।