नवा दुल्हिन कस जनावत हे

* नवा दुल्हिन कस जनावत हे *
            _______*******_______
  फागुन महिना बनके पहुना,
                        रंगझाझर मतावत हे।
  चारों खुँट मे लाली पिंवरी,
                      फूल फुलवारी लागत हे ।।
  परसा ओढ़िस लाल लुगरा,
                     दुल्हिन नवा जनावत हे।
  खेत खार म बगरे सरसों,
                      तेल हरदी चढ़ावत हे।।
  सेमर फूलगे अगास म,
                       जम्मो पाना झर्राये हे।
  मंउर पहिर के दुल्हा आमा,
                     अमरइया म मेछराये हे।।
   कारी कोयली मोहरी फूँके,
                        भोंगर्रा सुर मिलाये हे।
   जुरमिल के चिरई चिरगुन,
                           मंगल सोहर गाये हे।।
   मँउहा हे मतवार बरतिया,
                        सबो के मन ल मताये हे।
   ढोल नंगारा साजबाज के,
                          फागुन महिना आये हे।।
                          फागुन महिना आये हे।।
   _____________*****____________
                           नोहर आर्य,
     फरदडीह, जिला बालोद,छत्तीसगढ़ ।