हाँस के जिनगी जीथंव

** हाँस के जिनगी जीथंव **
        _______******_______
  काबर शरमावंव मय हर,
                             करम के पसिया ल पीथंव।
   दुख सुख के मया मितानी,
                             'हाँस के जिनगी ल जीथंव।।
* श्रम करे म शरम नइहे,
                              काम के जात धरम नइहे।
  मिहनत के रोटी जिंहा मिलथे,
                               मोर पसीना उहां गिरथे।।
टांठ करके अपन भरोसा .....पथरा ल घलो घिसथन!
    काबर शरमावंव.................पसिया ल पीथंव!
    दुख सुख के मया...............जिनगी ल जीथंव!!
* फोकट के खाय मजा नइहे,
                               कमा के खा कोई सजा नइहे।
   हाँथ काबर मय पसारंव,
                               जब बांहां भुजा म जान हे।
    मेहनत करहूं धरती दाई के,
                                    जब तक मोर परान हे।।
घाम पानी अउ जाड़ ल.......मय हाँस हाँस के सहिथंव!
    काबर शरमावंव..................पसिया ल पीथंव!
     दुख सुख के मया...............जिनगी ल जीथंव!!
*  छत्तीसगढ़िया सबले बढ़िया,
                                     फोकट नाम नइ कमांव।
    मुँहू के सिरीफ बोल नोहय,
                               बिन काम कांवरा नइ उठांव।।
सबो कमाओ सबो खाओ.......अहिच तो मय चाहथंव!
     काबर शरमावंव...................पसिया ल पीथंव!
      दुख सुख के मया.................जिनगी ल जीथंव!!
         ____________*******____________
                                नोहर आर्य,
       फरदडीह,(डौंडी लोहारा) जिला बालोद,छ.ग।