झन पूछो सुघराई के (नोहर आर्य) jhan puchho sughrai ke (nohar aarya)

** झन पूछो सुघराई के **
                        _____________
  चिखला पानी हरदी बनगे,
                              दुल्हिन धरती दाई के ।
  हरियर लुगरा पहिनिस देखो,
                               झन पूछो सुघराई के ।।
  मेचका झिंगुरा नाच नाच के,
                                गावत हे सुग्घर गाना।
   रुख राई मन झुमरे लागिन,
                                 मंजीरा बजाए पाना।।
    रिमझिम रिमझिम बरसे सावन,,,,,,,, ,,,,,,,,,!
     सुरूर सुरूर पुरवाई के ,,,,,,, ,,    ,,,,,,,,,,,,,,,,!!
  चिखला पानी हरदी बनगे,
                              दुल्हिन धरती दाई के ।
  हरियर लुगरा पहिनिस देखो,
                               झन पूछो सुघराई के ।।
   नंगारा बजावय बादर ह,
                            बिजली आरती उतारत हे ।
    रद रद रदरद पानी के बूंदी,
                              चिकारा रुंजू बजावत हे ।।
     उमड घुमड करिया बादर ह,,,,,,,,,,,,,,,,,,,,,!
    चूमे मुँहू रुख राई के,,,,,,,,,,,,,,,,,,,,,,,,, ,,,,,,,,,!!
    चिखला पानी हरदी बनगे,
                                  दुल्हिन धरती दाई के ।
  हरियर लुगरा पहिनिस देखो,
                                   झन पूछो सुघराई के ।।
  कनिहा मटकावत नंदिया नरवा,
                             नवा दुल्हिन कस जावत  हे।
  जस सजनी ह मिले के खातिर,
                               अब्बड के अकुलावत हे।।
  सुरूज लुकागे करिया बादर में,,, ,,,,,,,,,,,,,,,,,,,,,,,,!
   जस अंचरा म गोरी लुकाई के,,,,,,,,,,,,,,,,,,,,,!!
  चिखला पानी हरदी बनगे,
                                 दुल्हिन धरती दाई के ।
  हरियर लुगरा पहिनिस देखो,
                                  झन पूछो सुघराई के ।।
                                   झन पूछो सुघराई के ।।
  _____________*************__________
                          नोहर आर्य,
         फरदडीह, जिला बालोद, छत्तीसगढ़ ।