हम आदिवासी के, इहिच पहिचान

हम आदिवासी के,
                       इहिच पहिचान।
    एक तीर अउ एक कमान।।
* जंगल झाड़ी बपौती ये,
                 इही जिनगी इही रउती ये।
    नानपन के जानत हंन,
                 इही हमर पुरखौती ये।।
  * मोर कोरा म करमा ददरिया,
                मंजूर परेवना नाचत हे।
  जुर मिल के रहिथों तब तो,
            मोर रखवारी ले बांचत हे।।
*  पेड़ कटइया उधवा नापत हे,
          महल अटारी अपन खापत हे।
   सुवारथ बर धुर्रा धरा के,
           परियावरन के माला जापत हे।।  
  * जंगल मोर करम के बासा,
                  झन करव एकर बिनासा।
   एक दिन अइसे होही संगी
               हावा पानी बर छुटही आसा।।
* आओ सुग्घर ये तिहार मनाओ।
    जिनगी ल अपन सुफल बनाओ।।*
  परकिरिती के हम रखवार,
                    जीव जंतु के मांड़ा आय।
  सबो जीव संग मोर मितानी,
                       मोरों इंहेच बांड़ाआय।।
* कांदा कुसा फर फरहरी,
                          इही हमरअहारी ये।
   हमर हक तो होवय।
                     नोहे जंगल सरकारी ये।।
  * डारा पाना पान पतौवा,
                        सुग्घर मोर बिछौना हे ।
   सबले सिधवा भोला भाला,
                जल जंगल मोर मिलौना हे।।
    _________*******____________
                     नोहर आर्य,
     फरदडीह,जिला बालोद,छत्तीसगढ़ ।