मोर दंता ओ शिरी(तोषण चुरेन्द्र सरपंच धनगांव)

मोर दंता ओ शिरी... आरती तोर उतारँव

गंगा के पानी धरके ओ दाई तोर चरन ला पखारँव

मोर दंता ओ शिरी.....

दंतेवाड़ा मा बइठे ओ दाई दंताशिरी सुहाये

बड़ सिधवा हम तोरे लइका महतारी तिही कहाये

नरिहर बंदन फूल दसमत संग तुहिला मँयहा मनावँव

मोर दंता ओ शिरी......

महिमा तोरे बरनी न जाये नवदुर्गा तँय कहाये

कभू काली कभू चंडी बनके दानव ला मार गिराये

दरस देखादे तँय हा हो माता चरनन माथ नवावँव

मोर दंता ओ शिरी.......

पांच भगत मिल जस तोर गावय जय होवय ओ तोरे

भर दे झोली खाली ओ दाई अरजी ल सुनले मोरे

मिलके दिनकर काहत हावय तोरेच गुन ला सुनावँव

मोर दंता ओ शिरी.......

तोषण चुरेन्द्र "दिनकर"