छत्तीसगढ़ महतारी के ओदरा

        
            _________******_________
छत्तीसगढ़ महतारी के ओदरा,
                     कहूँ डिपरा त कहूँ खोदरा।
नंदिया पहार दुध के धार,
                     महिमा ऐकर अपरमपार ।।
किसम किसम के जिनिस,
                      पोटारे हे अपन ओदरा ।
रिकिम रिकिम के उपज म,
                   लहरावय अपन अंचरा ।।
कहूँ हीरा कहूँ पथरा हे,
                   कहूँ कोइला कहूँ लोहा ।
कहूँ गीता-रमायेन त,
                      कहूँ कबीरा के दोहा।।
अइसन मोर दाई के कोरा,
                       कहूँ खोदरा कहूँ डिपरा ।
जलरंग बांध बंधाए हे,
                      तब कहूँ हे पानी छिपरा ।।
किसान इंहा के बड मयारू,
                    रिकिम रिकिम उपजावत हे।
सगरो जग पोल पास के ,
                       अपन मया बगरावत हे।।
   __________*****____________
                     नोहर आर्य,
    फरदडीह, जिला बालोद, छत्तीसगढ़