अतकेच तो फरक हे

* अतकेच तो फरक हे *
        _____******_____
शहर अउ गाँव म,
                 अतकेच तो फरक हे ।
गाँव म जिनगी सरग हे,
                   तब शहर म नरक हे।।
                   गाँव
                  __*__
जुरमिल के जम्मो रहिथों,
                 सुख-दुख मिलके सहिथें।
मनखे बर मनखे जीथें,
                    सियान मन सबो कहिथें ।।
मनखे कोनो मरगे त,
                   गाँव भर के लकड़ी छेना।
शहर म कहाँ पाबे,
                     तरसे चिरई बिना डेना ।।
                  शहर
                 __**__
एक दूसर ल जानय नहीं,
                    नता रिस्ता मानय नहीं ।
भूले भटके पूछ लेबे त,
                     सगा घर ल बतावय नहीं ।।
गाँव के रहवइया ल,
                       कहिथे ओमन देहाती ।
  फसर-फसर सुतत हे,
                   नइ जाने का होथे पहाती।।
                    गाँव
                  __**___
बारी-बेला के साग पान,
                        खाय खुंदे ले अगराय ।
पारा परोस ल बांट के,
                         मया परेम ल बगराय।।
गंवईहा शहर जाय निही,
                      शहरीया गाँव आय निही।
गाँव म आनी-बानी खाय निही,
          शहरीया ल नून बासी सुहाय निही।।
अतकेच तो फरक हे,
                               शहर अउ गाँव म !!
   _________******__________
                    नोहर आर्य,
    फरदडीह, जिला बालोद,छत्तीसगढ़ ।