मुड़ मुड़ के देखना तोर आदत

मुड़ मुड़ के देखना तोर आदत हे का ।

या मया पिरित के तोला चाहत हे का ।

तै अपने-अपन कसमसावत रहिथस ।

दुनिया से तोला कुछ सिकायत हे का ।

अगर मोर संग मया हे तो आके बोल ।

अब तोला मोर सुरता सतावत हे का ।

बइहां मा आके, मन भर के प्यांर कर ।

अइसे दुरिहा ले प्यास बुझावत हे का ।

पहिली तो मोला तै अइसे नइ निहारे ।

अब मया के पीरा हर जनावत हे का ।

मोर खातिर सब ला बईरी बना डारे ।

संगी-सहेली तोला नइ भावत हे का ।