का होगे रे टुरी तोला 【कृष्णा पारकर 】【कविता】ka hoge guru tola krishna parkar kavita

का होगे रे टुरी तोला ,
        वादा अपन निभाए नही ।
तीन बजे तै आहुं कहे,
        सात बजे तक आए नही ।




रस्ता देखत बेरा बुड़गे ,
           अंधियारी होगे हे रात ।
मया ला तो तोड़ दिये ,
          झन करबे मोर से बात ।

कल तै आके रोना रोबे ,
       कहिबे मोर मजबूरी होगे ।
जानत हौं मै तोर लबारी,
        कहिबे काम जरूरी होगे ।




दु मिनट के समय ले के ,
       फोन घलो तो लगाए नहीं ।
तीन बजे तै आहुं कहिके ,
        सात बजे तक आए नहीं ।



कतको गलती माफ करेवं,
      कतको दियेवं तोला मौका ।
जान से जादा चाहेवं तोला,
         अउ तै दिये मोला धोखा ।




मोर से भारी गलती होगे ,
       सबले अलग तोला जानेवं ।
तोर मया मा अंधरा होके,
         मै पाछु पाछु तोर भागेवं ।



रात भर मै रोवत रहिगेवं ,
       तभो ले आंसु सिराए नही ।
तीन बजे के वादा करके ,
        सात बजे तक आए नहीं ।

                                          

                             कृष्णा पारकर
                           बिलासपुर सीपत
                       +91 93404 04933
कोई भी अंश तोड़ मडोर कर प्रस्तुत न करें इस कविता से सम्बंधित सभी copyrigth इस वेबसाइट और कवि के पास है कविता कॉपी पेस्ट करने पर साईट और गीतकार का नाम जरुर दर्शाए नही तो कॉपीराइट एक्ट के तहत आप पर कानूनी कार्यवाही हो सकता है सर्वसाधारण को सुुुचित किया जाता है।